حول لاجلك الرب الهك اللعنة الى بركة

حول لاجلك الرب الهك اللعنة الى بركة

لان الرب الهك قد احبك





و لكن لم يشا الرب الهك ان يسمع لبلعام

فحول لاجلك الرب الهك اللعنة الى بركة

لان الرب الهك قد احبك

(تث 23 : 5)



ماهى قصه هذه الايه؟

كان شعب الله فى طريقهم فى البريه يعيشون حياه النصرة واراد اعدائهم ان يوقفوهم فلم يقدروا وكان يوجد نبى اسمه بلعام ، فذهب اليه هؤلاء الاعداء لكى ياتى ويلعن شعب الله (يعنى يطلب ليه الفشل والهزيمه والانكسار) وذهب معهم هذا النبى وكل مرة يحاول ان ينطق بالكلمات المحبطه وكلمات اللعنه يجد نفسه ينطق بالبركه لهذا الشعب ويطلب له بركه

الله حول اللعنه التى ارادها الاعداء والتى ارادها بلعام الى بركه لشعبه واولاده



ماعلاقه هذا بنا؟



كثيرا من الناس يعيشون حياتهم وكانهم مصحوبون بلعنه تصاحبهم فى كل شىء او فى نقط معينه فى حياتهم

ولا نقصد هنا باللعنه اعمال السحر والشعوذة لكن نقصد نقط معينه فى حياتك اصبحت سبب مرار لحياتك ويمكن كنت تتمنى لو ماكانتش موجودة

يمكن بيتى هو سبب مرار حياتى، او اهلى ، او ابويا

يمكن البلد اللى انا فيها، يمكن تكون مشاعرى وعلاقاتى العاطفيه

يمكن خطيه معينه ، او علاقه معينه

يمكن حاجه فى شخصيتى او طريقه تربيتى ، او تصرفات معينه باعملها

المهم انه فيه شىء ما بيسحب من حياتى النعمه والبركه والقوة وبيرجعنى دايما لورا

وكل ماحاول اقوم الاقى اللى بيشدنى لتحت او لورا

يمكن تكون امور مقدسه وحلوة زى المشاعر والصداقه والابوة ولكن بالنسبه لى انا بقت زى اللعنه بقت شىء متعب جدا

فيه ناس لما بيحسوا بكده فى حياتهم بيحاولوا يغيروا الواقع بايديهم فبيفشلوا

وناس تانيه بتستسلم للواقع بعد شوية وبيفترض انه مش ممكن الامور تتحسن وان هذه النقط هاتفضل سبب مرار لى طول حياتى

طول بابا ده ماهو موجود ، طول مانا عايشه فى البيت ده ،طول ماشخصيتى عامله كده

واتسجن جوه سجن ويمكن كمان ابليس يخلينى اوصل لابعاد اكتر من كده زى مثلا انى فيه حد عملى عمل ولا حاجه ولا ربنا غضبان على ولا ولا ولا حاجات كتير

او انى منحوس وعمرى ماهاتجوز او عمرى ماهاعرف يبقى لى اصحاب او بيتى هايبقى فاشل لانى اتربيت فى بيت فيه مشاكل

الله عنده حل غير كل ده

اللـــه

يحول

اللعنه

الـــى

بركــه

عارف يعنى ايه يحول يعنى هى فعلا حاجه متعبه وظروف متعبه ووضع غلط بس الله ينفع يطلع منه خير وبركه وكانك كنت فى احسن بيت وعندك احسن اهل او كانك عمرك ماوقعت فى خطيه

صدق لان دى حقيقه الله لديه هذه القدرة المهوله على تحويل الاشياء لاشياء اخرى خالص

علشان كده اول معجزة السيد المسيح عملها كانت معجزة تحويل ماء الى خمر تغيير فى طبيعه الاشياء

برضه ينفع يعمل كده وياك فى كل امور حياتك وذكرياتك وخبراتك المتعبه

ابليس قصد بكل الامور دى تعب ومرار ليك لكن الله ينفع يطلع منها خير ومجد ليك عارف ليه

لانه احبك

الايه بتقول كده انه لم يشأ ان يسمع لكلام اللعنه وحوله لبركه ليه يارب علشان بيحبك

ولانه بيحبك ولانه يقدر فحيحول اللعنه والمرار الى بركه

علشان كده ينفع انه يطلع بركه لحياتك من الاب القاسى الغير متواجد .البيت المفكك والشخصيه الضعيفه والفشل والاحباطات

وحتى الخطيه اللى بقالها سنين تعباك الله هاينفع يحولها لبركه فى حياتك

مش بس كده

و تكون بركة



"فأجعلك أمة عظيمة وأباركك وأعظم اسمك ، وتكون بركة"

(تك 12 : 2 )



يعنى مش بس الله هايباركك لكن هايخليك انت نفسك تبقى بركه لكل حد حواليك وتبقى بركه فى اى مكان تكون موجود فيه



الاخبار السارة



انت مش مضطر انك تفضل زى مانت بسبب مشاكل فى حياتك عملتها لنفسك او الناس عملوها فيك



ينفع اللى جاى يبقى عكس كل اللى فات من عمرك



مش لازم كل الدنيا اللى حواليك تتغير علشان انت تبقى شخص تانى سعيد ومتبارك وفرحان



ينفع ربنا يباركك من اليوم ويغير حياتك



الله بيحبك وينفع يحول ويغير اى شئ علشانك



اللى انت فيه مش نهاية الدنيا ينفع اللى جاى يبقى رائع ومختلف



الله عايز يباركك مش عايزك تفضل فى مرار



جرب تروح لله بالعك اللى عملته فى نفسك واللى الناس عملوه فيك وقوله يارب سمعت انك ينفع تطلع من الفسيخ شربات ومن الجافى حلاوة ومن الموت حياه

يارب طول عمرى الامور دى سبب ضغط وتعب ولعنه ومرار فى حياتى

هاجيلك بيها يارب حولها الى بركه

يمكن ماكونش فاهم ازاى ويمكن اكون مش قادر استوعب قوى

بس انت قلت انك بتحول اللعنه الى بركه

ولما الله يحط جواك انك تعمل حاجه علشان الامور تتغير او انك تلجأ لحد علشان يساعدك ماتأجلش

لانه عايز يباركك بجد ويخليك انت نفسك بركه



زى اوغسطينوس اللى عاش سنين فى الخطيه والله جعله بركه لكل حد يقرا سيرته

منقول لاخذ الموعظة والبركة