مستني ايه ؟؟؟؟ أنت .. أيوه أنت ياللى بتقرا الكلام مستني أيه .. مستنى لما تروح مستني لما تخسر كل حاجه

مستني ايه ؟؟؟؟
أنت .. أيوه أنت ياللى بتقرا الكلام
مستني أيه .. مستنى لما تروح
مستني لما تخسر كل حاجه
تخسر الله على الأرض وتخسره كمان في السما
‎...‎
أنت ليه قافل قلبك

أيوه أنت


قافله ليه .. ليه بتقسى قلبك .. دا هوه بيحبك ..

ايوه بيحبك أنت .. أنت ياتراب ..

بكل شهواتك وخطاياك بيحبك

شفت رغم كل إللى أنت بتعمله

كل يوم ينادى عليك .. ويصرخ .. تعالى ياحبيبى أنا بحبك



وأنت ولا هنا .. عامل نفسك مش سامع
كل يوم يمشى قدامك علشان يحرسك ويسندك .. وأنت ولا شايفه


كل يوم ماسك أيدك .. وهو فرحان ومبسوط علشان ماسك إيدك ..


وأنت عمال بتزقه .. وتخبط فيه يمين وشمال


أنت أيه .. محجر قلبك عليه ليه

هو أنت كنت تطول كل الحب ده


شوف أنت بتعمل فيه أيه .. وهو بيعملك أيه


وهو مش عارف يعمل حاجه .. غير أنه يقف قدامك وعينه تتملى بالدموع

ليه القساوه دى .. ليه .. هو عملك أيه غير أنه بيحبك .. بيحبك وعاوزك تكون معاه

فووووووق أرجعله اسمعله

ده بيحبك بدون مقابل .. دا بيحبك وعاوزك تكون معاه فى كل مكان .. على الأرض وفى السما كمان

ما أنت لو تعرف أو تحس هو أتألم أد أيه .. عشان تعيش العيشة إللى أنت عيشها دلوقتى

لو تعرف الثمن إللى دفعه علشانك .. لو تعرف كمية الآلامات اللي حس بيها .. والدم إللى نزفه

بس لو تحس !!

عمال تتنطط وتتكبر وتتبطر على النعمه إلى مدهالك ليه



ليه .. فوق .. عارف ربنا من حبه ليك .. بيقف قدامك وعيونه مليانه دموع .. عارف ليه .. عشان بيحبك
أصل إللى بيحب حد .. بيفضل يبكى عشان عاوزه يبقى معاه .




شوف بقه أنت بتعمل أيه وبتبكى أد ايه .. وهو بيبكى عليك بحرقه .. بيبكى الدموع دم
عشان بيحبك
لكن أنت قلبك قاسى .. مش بتحس بيه

مخك ملهى في الأرضيات والشهوات ..


واحد عمال يهتم بشكله قدام الناس ..

والتانيه عماله تهتم بالميكياج والموضة ..


وكل واحد يحاول يشد أعجاب وانتباه البشر ليه

ليه كل ده .. الحياة أبسط من كده ..

فكر في حاجه .. أنت وأنتي حياتك تفضل لكام سنه ..

بالكتير أوى أوى أخرك على الأرض

80 _ 90 _ 100 سنه او دلوقتي مين عارف


لكن شوف حياتك في السما مع حبيبك يسوع هتبقى أد إيه .. تخيل أنها ملهاش زمن .. تفضل قدامه علطول
تلاقيه فاتح حضنه ويقولك تعالى .. قعد في حضني شويه عشان أنت وحشتنى أوى


أمسك نفسك من شهوات العالم والكلام الفارغ مدة حياتك على الأرض ..

عشان تكسب العمر إللى ملهوش نهايه


صدقونى .. الحياة على الأرض مش دايمه ..

قوم صلى .. دا بيحبك .. قوم نادي عليه

هتلاقيه سمعك صدقني .. وخلى بالك عدو

الخير هيقولك .. ماعدش شايفك ولا بيسمعك ..

خليك واثق يا حبيبي .. أنه سامعك وحاسس

بيك .. وعارف نفسك في أيه .. وشافيك وأنت

واقف تكلمه وشايف دموعك .. ونفسه يمسح

دموعك بأيده .. عارف يعنى أيه نفسه

هو بيحبك .. وكل يوم مستنيك .. لأ دا كل لحظه هتلاقيه مستنيك

قوم صلى دلوقتى .. وأبكى .. قوله انا بحبك لكن مش قادر أوصلك
بحبك لكن مش عارف أعمل حاجه تعبر عن حبى ليك


صدقنى بيحبك بجد

مد ايدك واندة علية وقولة

اتصرف انت يارب فيا ....